[الاستاذ على الدين يحيى]

ترميل السنون

الجر من البر
فكرة الجر هى جذب انتباه الأسماك عن طريق جر سمكه هيكليه او معلقه او طعم حى""لا يشترط انه يكون حى حرفيا انما المقصود سمك طبيعى"" فى الماء السبب من عمل مكن و بوص و عدة جر هو ان تاثير ضربة السمك فى الجر بيكون عالى جدا على الخيط نتيجة ان الجر و سرعة اللنش فى اتجاه و السمكه لما بتضرب بتروح فى اتجاه تانى لأن اول همها انها تخطف الطعم مما قد يؤدى الى قطعه او اصابة ممسك الخيط لذلك تم عمل جرس و فرامل فى مكن الجر

نتيجة ما سبق كان لازم يحصل تعديل تانى على البوص لأن الفايبر و الأنواع التانيه ممكن ماتصدش مع احجام سمك الجر فتلاقى حضرتك بوص الجر غالبا ما بيكون صب و قصير و حلقاته حتى شكلها مختلف و غالبا ما بتكون فيها حلقات بعجل معدنى داخلى طبعا ممكن تجر على ايدك بس يستحسن يكون فيه جوانتى لو ماسك الخيط على ايدك و تكون مسيب شوية خيط على ارضية الركب عشان تسيب شوية لحظة الضربة الأولى و لو احتاجت تسيب تانى لو قلت لى انك تثبتها بفيوز زى السبحه فى شمعة المركب هاختلف معاك لأن السبحة تقيله و فيها وزن حوالى 3 كيلو بيهدوا اجدع سمكة و بيحدوا من قدرتها على العوم بهذا الوزن بينما الرابالا خفيفه و ممكن السمكه تلاعبك لحد ساعة زمن لو تقيله من غير ما تتهد
بالنسبة للسبحه ينفع معاها المعلقه و الطعم الحى و نتائج الرابالا الى حد ما ضعيفة و انا باتكلم عن تجربتى الشخصية و ليس للتعميم
الجر سواء بمكنه او على اليد له تقل مخصوص و هو شكله زى الرصاصه البلحة و بعدين من اطرافه فيه قطعتين من سلك النحاس حلزونى الشكل لسهوله تركيبه و فكه من الخيط بدون الأحتباج لتدكيكه زى الوش العادى بتاع التسقيط و بيكفى تقل واحد او اتنين لتغطيس الرابالا
الخيوط عندك من اول 70 و انت طالع لحد 120 و انت و رزقك و حرفنتك طبعا لو نازل برابالا فيه مدرسة بتتركب الرابالا بخيه فى طرف الخيط انا شخصيا بافضل اركب مدور بكلبس اركب فيه الرابالا تلافيا لأن الخيط يفضل يلف و يبرم و كمان لسهولة تغيير الرابالات بانواع تانية

فيه ناس برضه بتعمل وش واير قبل الرابلا بس انا الحقيقه برضه مش مقتنع بالذات مع الرابالات الكبيره ال 14 سم و انت طالع لأنه بيخلى الخيط يبرم برضه بالأضافه ان السمك حتى لو براكودا لما بيضرب الرابالا بيضربها يا أما من تحت لفوق فى نص السمكه او من الخلف و بالتالى مفيش خوف انه يقطع الخيط الا عفوا نتيجة خطأ صياد

طبعا فى الحاله دى بتعمل مدورين واحد بين خيط الماكنه و الواير و التانى بين الواير و المعلقه او الرابالا لو صغيرة

الوش الواير مجدى مع المعلقة و الرابالا الصغيرة لأنه لو دخل عليها سمك كبير ممكن يبلعها و هنا مكمن الخطورة من قطع الخيط لو جه تحت سنانه



سبحه التسقيط

اولا بسحة التسقيط الخاصة بالوعر

طول العمود : 80 سم تقريبا
سمك خيط العمود : 30
عدد السنون : 5 سنون
مقاس السن : 8 أو 9 كفتة
خيط السن : 20 أو 25
التقل( الرصاص ) 50 جم
ولا ينصح بوضع سن أسفل الرصاص لتجنب التوعير ...والشكل موضح بالرسم ( معلش مش أد كده بس يقضي الغرض )



ثانيا بالنسبة لسبحة الغوزيلة
طول العمود : 120 سم
سمك خيط العمود : 40
عدد السنون : 10 أو 12 سن ( حسب حبك للجشع )
مقاس السن : 7 أو 6 كفتة
خيط السن : 35
التقل : 100 أو 120 جم حسب العمق أو شدة التيار ( لتجنب الكعبلة ) ومن الممكن وضع سنارة أسف التقل ( لعدم وجود صخور في هذه المناطق )