بالأسـبريـن ... والسـكاكــين
وبـالمســدس مـقتـولـــين
عـلى أعـمـدة كـل الـجرايـد مصـلوبين
شـبان صــــغــــــار
أزهـار فى فـجـر العمـر ما شافتش النهـار
متـكلبشين فى الزنــازين أو مـغروزيـن
فى الطـين فى قصـر النيل وعايزين غطاسين
ع المشـرحـة إنسـان نـحيف
بشـنب خـفيف أصـفر لطـيف
خـدوده من قيمـة يــومين مش محـلوقين
صــوابعه من شــرب السـجاير محروقين
عينيــه على جــدار الفـراغ متسـمرين
وعلى الـجبين رفــرف ســـلام المـيتين
مـا تســــألوش كـــان اســـمه إيـه
إسـمـه على المحضـر بـقى المـجنى عليه
إسـمـه بـقى الـجثة فى أوراق الدوســيه
ما تسـألوش عن قصـته كـان مـوتـه لـيه
المسـألـة صــبحت فى إيـد المسـئولـين
عـلى ذمـة التـحـقيق سـجين
إنسـان حـزين
فـى قلبه إحسـاس الـغريــق
مالـهش عـون
فى دمـاغه أكـتر من حـريـق
لابـس قمــيص مربـعـات وبنطـــلون
وف رجـله صـندل مـن زمـان مالهش لون
يبـص عـلى آخـر الطــريق
يـلاقيـه مـا بين رجـليه تمـام
ثـابـت عـليـه الاتــهــام
وحيـاتـه بين النـاس حــرام
حـرام عـليـه يـركب تـرام
حـــرام عــليــه الأتــوبيــــس
حـــرام عـليـه الأرصـفة والفـوانـيس
والمــدرســـة والســينمات
مـكتوب عليه يـعيش مابين المـحـابـيس
فـــى اللـــومــانــات
ما تســـألوش ده يبـقى مـين
شـفتوه وبتشـوفوه كـتير فى الـجـرانين
بـــلاش ســــــــؤال
عـلـى كـــــل حــــال
المسـألة صـبحت فى إيـد المســـئولـين
على نـاصـية الشـارع أمـين
واقف مـع حسـين واسـمـاعين
وبنيــامـين
متســـرحـين ومشــمريــن
وشـوية يـوصـل مصـطفى وعبد السـلام
ويبتــدى يـحمى الـكـــلام
ويــغمزوا بــعينـهم ويمـكن يشــتموا
ويـقولـوا لـفظ بـذئ وهمــا بيضـحـكوا
ماتفرحـوش لما تشــوفوهــم من بــعيـد
نـازلـين هــزار وقـزقــزه
ومـاتقــلوش يــاريت زمـان التلـمـذه
يـعـود علينـا مـن جديـد
بـيشــتموا
وف كـل قـلب صــراخ يـحـاول يكتمـه
بيضــحكوا
وف كـل صـدر عويـل ونـار راح تهـلكه
وتفرتـــكه
ماتفرحــوش
وفــكروا إزاى نــحـوش
اللـى حايشـــرب له قـزازة أســبرين
واللـى حـايـطعن أمـه أربـع سـكاكـين
مـن قبـــل مـا الميت يـــمـــوت
مـن قبـل مـــا الأيـــام تــفـــوت
والمســألة تصــبح فى إيــد المسـئولين.